زندہ قومیں اپنے شہداء کی قربانیوں کو کبھی فراموش نہیں کرتیں، قائد تحریک الطاف حسین

متحدہ قومی موومنٹ کے بانی وقائد جناب الطاف حسین نے سانحہ 31، اکتوبر1986ء کے شہداء کو زبردست خراج عقیدت پیش کرتے ہوئے کہا ہے کہ حق پرست شہداء کی لازوال قربانیاں تمام وفاپرست تحریکی کارکنان کیلئے مشعل راہ ہیں۔ سانحہ 31 اکتوبر1986ء سہراب گوٹھ کراچی اور مارکیٹ چوک حیدرآباد کے شہداء کی 31 ویں برسی کے موقع پر اپنے ایک بیان میں جناب الطاف حسین نے کہاکہ زندہ قومیں اپنے شہداء کی قربانیوں کو کبھی فراموش نہیں کرتیں اور آج بھی ہمارا عزم ہے کہ ہم اپنے شہداء کی قربانیوں کو ہرگزرائیگاں نہیں جانے دیں گے ۔ جناب الطاف حسین نے پاکستان سمیت دنیا بھرمیں مقیم کارکنوں اورہمدردوں سے کہاکہ وہ اپنے اپنے گھروں میں شہداء کے ایصال ثواب کیلئے قرآن خوانی وفاتحہ خوانی کریں اور جس نیک مشن ومقصد کیلئے حق پرست شہداء نے اپنے لہو کے نذرانے پیش کیے ہیں اس مشن ومقصد کے حصول کیلئے کسی بھی قربانی سے دریغ نہ کریں۔ جناب الطاف حسین نے سانحہ سہراب گوٹھ کراچی اورمارکیٹ چوک حیدرآبادکے شہداء سمیت تمام شہداء کے بلنددرجات اور شہداء کے لواحقین کیلئے صبر جمیل کی دعا بھی کی ۔